Magnífica fervenza localizada no río Fírbeda, Fírveda ou “das Mestas”, afluente do río Limia que nace da unión de varios regatos no concello de Calvos de Randín na comarca da Alta Limia e moi preto da “Raia” con Portugal, pola serra de San Tomé, a que marca os limites da chaira limiá.

O río tras encaixarse no val, forma entrando no concello de Porqueira uns rápidos e unha secuencia de fervenzas que poden observarse na ruta de sendeirismo que percorre o concello. Esa celeridade do río foi aproveitada durante séculos para a construción de varios muíños que poden visitarse na actualidade aínda que parcialmente derruídos.