A igrexa de San Pedro, no mesmo núcleo histórico de Bande, construíuse no século XVIII. É de estilo barroco, pero a pesares diso, presenta uns muros sinxelos e con pouca decoración. A súa planta é de cruz latina, con robustos muros. As cubertas empregan diferentes tipos de bóvedas: de canón e cruceiría. No seu interior poden observarse diferentes altares e retablos tamén barrocos.

No exterior linda coa casa reitoral na que se pode observar un escudo que fai referencia á pertenza da igrexa ao mosteiro de San Salvador de Celanova. Ambas edificacións están acompañadas por tres carballos centenarios. Os tres aparecen recollidos no Catálogo de Árbores Senlleiras de Galicia polas súas características. As súas alturas oscilan entre os 13´40m; 15m e 16´90m. Con perímetros de entre 3´75m e 5´50m. Estímaselles unha idade de entre 200 e 300 anos.