Fermosa área recreativa situada a menos dun quilómetro do “Viso da Porta da Veiga”, unha das mellores panorámicas da Limia dende o sur. Por baixo do “Penedo das Fatigas” e dentro dunha pequena ruta de sendeirismo sinalizada co nome de O Cebreiro – Raíña Loba. A fonte foi sempre lugar de concentración dos paisanos para comezar a batida do lobo, así é que moi preto está un dos maiores “foxos do lobo” da península ibérica, onde se cercaba ao animal para lle dar morte.

A ruta, que pasa pola Peneda da “Raíña Loba” e pola “Peneda das Fatigas”, ten arredor de 12km, é circular e pódese realizar nunhas tres horas a pé. Todo o camiño está repleto de vexetación de media montaña, con maioría de piñeiro e carballo. A “Peneda das Fatigas” é unha mole rochosa acabada en forma redonda, a modo antropomórfico. As vistas dende alí son espectaculares, coa Serra do Larouco, o val do Salas, o entorno da Reserva da Biosfera Transfronteiriza Gerês-Xurés (RBTGX) ou toda a chaira da Limia.