A área protexida (de 350 hectáreas), localizada en Arcos, Ponte de Lima, inclúe varios valores naturais que a converten nun importante espazo para a conservación e divulgación da natureza e da biodiversidade a nivel rexional, nacional e internacional. Isto débese á presenza dunha grande diversidade de hábitats de conservación prioritaria asociados a un humidal continental.

No espazo existe unha rede de sendas peonís (de escasa dificultade)  que se adentran na lagoa, e que promoven o contacto directo coa natureza. A ruta pódese comezar dende Bertiandos, con mostra de casas señoriais (Solar de Bertiandos) Despois atravesamos o río Estorãos, e a súa fermosa ponte e xa entramos na rede de rutas sinalizadas.

Fundamental é a presenza do Centro de Interpretación Ambiental, 1’5 km máis adiante, onde se pode atopar moita información sobre a fauna, flora, interpretación do territorio, características específicas do río Lima, etc. En canto a especies arbóreas, falamos de salgueiros, amieiros, carballos, bidueiros e freixos. Pola fauna; anfibios, pequenos mamíferos e, sobre todo, aves, tanto migratorias como afincadas.