Ponte  de  Lima  consolidouse  nos últimos anos como  un  “destino  ecuestre internacional”.  A  Feira  do  Cavalo  é  o  máximo expoñente das actividades asociadas ao mundo dos équidos. Os espectáculos de razas nacionais, as actividades deportivas e as competicións asociadas ás razas e o traballo con cabalos son o punto forte do evento. Ademais, cóntase con expositores de calidade, o que, en conxunto, teñen axudado a dinamizar a vila limiá.

A primeira edición remóntase a 2007, coa organización da Asociación Empresarial de Ponte de Lima, o municipio e a Escola Superior Equestre,do Vale do Lima tivo moito éxito. Dende aquela, fóronse asentando as bases dun certame que hoxe goza de grande prestixio, a un e outro lado do Lindoso: a feira de xullo compleméntase con xogos ecuestres, concursos de saltos, concurso-ensino, etc. En 2008, a festa foi premiada como un dos mellores eventos de animación turística de todo Portugal. Ao longo destes anos, foise consagrando a marca “Ponte de Lima Equestre”, sendo esta unha grande vía a nivel de difusión turística, deportiva e cultural, de promoción dos produtos limiaos por todas partes.

Dentro da organización das últimas edicións, colaborou tamén a comisión organizadora da Festa de Feiras Novas, entre outros axentes implicados.