O Castelo de Canderrei é o mellor miradoiro para comprender a transición do val do Limia cara o Támega. Situado no denominado como “Monte do Castelo”, os investigadores falan da posibilidade de que este lugar contara no pasado cunha torre de vixilancia semellante ás dos municipios de Sandiás e Porqueira, entre outros.

Esta estratéxica situación fai tamén que outros historiadores especulen coa posibilidade de que no lugar existira xa antes un asentamento castrexo da Idade do Ferro. Malia a que estas propostas aínda non foran confirmadas son varias as citas escritas do lugar en época medieval. Sendo descrito como unha eventual fortaleza no século XI e nomeado en varias doazóns reais no século XIV.

Na actualidade o espazo conta cunha capela barroca, na honra á Virxe dos Remedios. A pouca distancia, máis abaixo do monte, sitúase a parroquia á que nomea: San Salvador de Viladerrei. Topónimo tamén que podería estar indicando a existencia dun asentamento propio da realeza medieval, sendo a vía de acceso natural á Limia dende Tras os Montes e Alto Douro.