Situado na marxe dereita da ría que forma o río Lima preto da súa desembocadura, e en pleno corazón da cidade, o Parque Ecolóxico Urbano Viana do Castelo está situado na chaira inundable do río Lima, que resulta da deposición de sedimentos como grava, area e lodos. Este tipo de ambiente é crucial para a formación de certos  tipos de hábitats, permitindo a colonización de diferentes seres vivos. O parque foi inaugurado en 2008. Tras unha época en que só abría para visitas a grupos, pasou a estar recentemente aberto para o público en xeral.

O parque é alimentado cada día pola auga salobre proveniente da marea e tamén da auga doce da ribeira de S. Vicente, formando hábitats de transición, adaptados perfectamente ás variacións da salinidade. É un espazo preparado para actividades de recreo, de lecer, de educación ambiental e de conservación da natureza, integrado dentro do Centro de Monitorização e Interpretação Ambiental (CMIA, 2004) Dito centro comprende exposicións temáticas de carácter temporal: obradoiros de sensibilización, actividades de formación, culturais e recreativas, celebración de días temáticos, apoio na exploración dos xardíns comunitarios.

Xa no século XIX, esta área fora obxecto dunha intervención que prevía a instalación dun muiño de mareas (o primeiro da rexión) mediante un sistema hidráulico coñecido como as Azenhas de Dom Prior, en alusión á iniciativa de António de Araújo, prior da colexiata de Barcelos. Logo de dous séculos, o muiño consta de dous corpos rectangulares e catro arcos cara abaixo, cun interior en mal estado. Continúa, iso si, a operar pola forza motriz da auga.