Ponte de Lima goza dun notable abano á hora de realizar actividades no seu entorno, dende sendeirismo, equitación ou ciclismo, actividades acuáticas no río Lima, golf, ou tenis ata paseos a cabalo, en bicicleta, etc.

Estas actividades son proporcionadas por empresas locais que centran os seus produtos turísticos na aventura, o deporte ou os encontros sociais e culturais. De especial interese é o Clube Náutico, referencia en organizar competicións internacionais, unha das grandes marcas do deporte limiao (canoa, remo, kayak, baixada do río Limia, etc.) Para os máis atrevidos, existen equipamentos e empresas que ofrecen actividades “radicais”, cheas de adrenalina. Deste xeito, o Parque Radical é un equipamento multidisciplinar para satisfacer os amantes da bicicleta BMX, o skate ou os patíns.

Outro elemento a destacar neste campo é o Bike Park, situado na Serra d’Arga, con servizos de bici de montaña, enduro ou paseos turísticos. Na vila, e dentro do Parque Urbano, cóntase cunha pista de Pump Track, ou percorrido peraltado de habilidade, destinado a bicicletas sen pedais.

Ponte de Lima tamén conta con servizo de visitas guiadas, piscinas públicas e varias infraestruturas complementarias para favorecer o desfrute do turista, a seu paso polo Alto Minho.