Unha das rutas de montaña máis fermosas que a día de hoxe poden facerse en Galicia. Dende a base ata o cumio da serra de San Mamede, combinando as paisaxes de ribeira e prado no fondo do val, cos amplos horizontes e inigualables panorámicas do alto da montaña.

Na aldea de Rebordechao podemos observar o panel informativo con todos os datos necesarios para emprender o ascenso. Podendo optar por diferentes opcións de ruta segundo o noso tempo e estado de forma. Na opción longa chegaremos ata o alto da serra a máis de 1600 metros de altitude dende onde poderemos contemplar unha inigualable panorámica de toda a fronteira luso-galaica. Nunha panorámica total do Alto Támega, a Serra do Larouco e a propia Serra do Xurés-Gerês. Na opción curta, moito máis moderada e ideal para a práctica do sendeirismo en familia, descubriremos o misticismo agochado no Pozo dos Mouros.

Rutas aptas para calquera época do ano, dende o agromar da natureza na primavera ata o encanto da caída da folla de outono. Un punto de encontro para os amantes da aventura onde poder practicar deportes de montaña como BTT, esquí de fondo ou travesías en raquetas en época invernal.