Localizado na freguesía de Lindoso esta fortaleza ten un emprazamento estratéxico, cunha súa posición dominante compartindo vistas a Galicia e a Portugal. O que incide na súa funcionalidade de vixía, defensa e marco de fronteira entre ambos os dous países.

Foi construído durante o mandato de Afonso III (S. XIII), época na que a recente independencia portuguesa se estaba a asentar. Cóntase que o rei D. Dinis, no seu primeiro día na zona, bautizou o lugar polo lindo e alegre que era, aínda que pode ser que o nome veña do latín “limitosum”, límite. Xa no século XVII, volveu cobrar grande importancia, na guerra da Restauración entre Portugal e Castela. Sendo plenamente portugués dende 1663.

Tamén é considerado como un dos máis importantes monumentos militares portugueses polas novidades técnicas arquitectónicas empregadas na época da súa construción. Presenta características románicas e góticas, razón que lle valeu a xustificación para ser declarado “ Monumento Nacional” no ano 1910 e reconstruído nos anos 40. Conserva boa parte da muralla visible sendo visitable tamén o interior onde podemos observar unha capela, un forno, unha torre da homenaxe de 15 metros e un museo con exposicións permanentes sobre a evolución e a ocupación humana do territorio.

No exterior, aparte das fermosas vistas sobre o encoro homónimo, o val do Limia e as Serras do Xurés e da Peneda ao fondo, pódese apreciar na propia aldea do un fantástico conxunto de 64 hórreos de pedra (unha das maiores concentracións do estilo no mundo), denominados nesta zona como “espigueiros”. Algúns teñen ata 200 anos de antigüidade, e foron parte indisociable da cultura popular, así como da alimentación de subsistencia tan recoñecible a ambos lados da fronteira.