Ponte de Lima, poboación que, como Xinzo de Limia, honran o paso do seu río, ten o título da “vila portuguesa máis antiga”, outorgado pola raíña Dona Teresa en 1125. Se pasase a ser chamada “cidade”, perdería este galardón. O centro histórico de Ponte de Lima, pequeno e moi fácil de percorrer a pé, inclúe unha grande variedade de puntos de interese relacionados co patrimonio arqueolóxico e arquitectónico, símbolos da súa magnífica e dilatada historia.

Como capital  do “vinho verde”, conta cun centro de interpretación e promoción. Paso do camiño portugués do interior que une Braga con Compostela, a súa ponte medieval (monumento nacional de orixe romana e 380 metros.) é todo un símbolo na entrada ao núcleo histórico. En memoria ao paso da lexión romana que tentou cruzar o río do “esquecemento” (outro paralelismo con Xinzo), unha figura de xeneral romano chama a seus lexionarios situados na outra beira do río “Lethes”.

Moi preto, outra estatua, esta de labregos, reclama a atención. É a escultura alegórica das Feiras Novas e o Folclore. Outros monumentos son: a homenaxe á vaca das cordas, o memorial aos “heróis de ultramar” ou a estatua á antedita raíña Teresa.

Non moi lonxe, o Largo de Camões permite palpar a vida no centro, na praza co seu pelourinho onde se axustizaba aos “malfeitores”. Outro punto de obrigada parada é a Igrexa matriz (s. XV, inspirada na de S. Francisco de Oporto), coa veciña da “misericordia”, xusto en fronte, máis recente. Outros elementos a salientar son os pazos do concello, a praza da República e as torres da Cadeia Velha (hoxe oficina de turismo) e a de São Paulo, que formaban parte da muralla medieval construída por Pedro I (s. XIV), e que contaba con 10 torres e 6 portas.

Ponte de Lima, ao igual que a vila galega de Allariz, gábase de ser unha cidade “florida”, lugar de paisaxismo e exaltación da beleza dos seus xardíns. Boa mostra son os de Adelino Sampaio, os dos Terceiros, o Parque da Guía, a Avenida dos Plátanos ou o Festival de Xardíns no Parque do Arnado. Por último, o Pazo do Marquês, co seu aspecto de fortaleza, complementa unha visita imperdible á vila onde o Lima é o todo.