Os miliarios son fitos en forma de piar ou columna que marcaban as distancias nas calzadas romanas. Neste territorio acostuman a ser de granito, con base cúbica ou cadrada, chegando a medir entre 2 e 4 metros de altura. Colocábanse na beira das calzadas para sinalizar as distancias cada “mil passus” (unha milla romana, arredor de 1480 metros).

A súa maior parte tiñan inscrito os seguintes datos: título completo do emperador en mandato que o mandaba construír; distancia ata a localidade máis importante da vía na que se encontrara (tamén podendo indicar a distancia entre dúas localidades concretas); o gobernador ou unidade militar responsable das obras da calzada e a expresión “refecit” ou “reparavit” se se trataba dunha obra de mantemento.

Os miliarios de Sandiás están dentro da VIA NOVA ou nº. XVIII do itinerario de Antonino, que cruza o concello de Sandiás polo núcleo de Vilariño das Poldras. Estamos ante o treito limiao da principal vía de comunicación da Gallaecia romana, que comunicaba a cidade portuguesa de Braga (Bracara Augusta) coa española Astorga (Asturica Augusta).

Esta calzada conta na actualidade coa maior densidade de miliarios de todo o Imperio Romano (uns 300), sendo utilizada durante séculos como a principal arteria de comunicación entre o norte de Portugal e o sur de Galicia.

Os Miliarios de Vilariño das Poldras que hoxe poden contemplarse xuntos foron localizados no ano 1995 nunha leira próxima coñecida como A Lama. Actualmente atópanse na pista que une o núcleo de Vilariño coa capital municipal. Nun grupo de tres, os máis pequenos non conservan ningún trazo de escritura, namentres o de maior tamaño está dedicado ao emperador Maximino e ao seu fillo Máximo, sinalizando a milla 67. Este último é considerado como un dos epígrafes mellor conservados de toda a VIA NOVA..