A denominación completa desta festa é a de “Exaltación da Empanada de Forquellas e da Carne de Cachena da Serra do Quinxo”. Esta homenaxe de exaltación gastronómica pretende poñer en valor unha raza vacúa que se encontraba  en  perigo  de  extinción:  a  Cachena.  Unha  vaca  de  grande  rusticidade  e  moi adaptada  ás  singulares  formacións  graníticas  da serra antedita, a case 1200 metros de altitude.

A forquella é un tipo de embutido realizado con carne de porco, allo, cebola, pemento e cabaza dentro dun intestino delgado. Un produto típico local que se mantería vivo grazas á veciñanza de Entrimo, que antes da festa o elaboraba de forma caseira en tempos de matanza.

A  festa, que cambiou de maio para o primeiro fin de semana de xuño, celébrase nun ambiente lúdico sempre amenizado por música tradicional e actividades para todas as idades. En 2019 contábanse con 16 edicións, antes de que a pandemia limitase as edicións de 2020 e 2021.

O lugar da festa é o pavillón polideportivo de A Terrachá, na capitalidade do municipio de Entrimo, e con capacidade para máis de 800 persoas. O evento complétase cos produtos tradicionais e mostra de artesanía.